Sortuk ilusio handiz eta laguntzeko konpromisoz jaso du ELNk eta Kolonbiako Gobernuak elkarren arteko elkarrizketen hasiera jasotzen duen albistea.

Kolonbiako bake prozesua, azken “plebiszitua”ren ondotik, zalantzazko uneak bizi ditu. ELN eta Kolonbiako gobernuaren artean elkarrizketa mahaia abian jartzeak Bakearen ezinbestekotasuna agerian uzten du.

Zailtasun guztien gainetik, Kolonbian bake justu eta iraunkorra behin betiko lortzea eztabaidaezina dela pentsatzen dugu, nahiz eta bidean oztopoak bata bestearen atzetik aurkitu.

ELNren eskuetan zeuden zenbait bahitu askatu izanak bake prozesua eraikitzeko keinu adierazgarritzat hartzen dugu. Sinestuta gaude Quiton hasi diren elkarrizketa publikoek bake justu eta iraunkorra lortzeko bidea erraztuko dutela.

Bakea lortzeko helburuarekin aldeak animatu nahi ditugu eta gure babes osoa adierazten diegu elkarrizketa saio hauei.

Sorturen delegazioa, Rufi Etxeberria eta Urko Aiartza Sortuko kideek osatua, ELN eta Kolonbiako Gobernuaren negoziaketen irekiera ekitaldian egongo da.

Negoziaketen irekiera ekitaldia gaur, Quiton (Ekuador), arratsaldeko bostetan (Euskal Herriko 00.00ak) izango da, eta bertan hasiera emango diote ELN eta Kolonbiako gobernuaren arteko negoziazioen fase publikoari. Zabaltzen den fase honetan, martxoaren 31an iragarritako agendaren puntuak jorratuko dituzte.

Sorturen izenean, fase berri honi gure babes osoa adierazi nahi diogu, eta bidenanar, balorean jarri nahi dugu ELN eta Kolonbiako Gobernuaren artean bakearen eraikuntzan orain arte egindako bidea.

2016ko urriaren 27an

Sorturen ordezkaritza bat, Rufi Etxeberria eta Urko Aiartzaren eskutik, FARCen konferentzia historikoan dago.

Sortuk lehen eskutik jarraitu nahi izan du FARCen konferentziaren berri eta, bertan egonik, hainbat harreman burutu.

Izan ere, Sortuk garrantzia berezia eskaini dio Kolonbiako gobernuak eta FARC-ek sinatutako akordioari, oso berri ona delako eta euskal gatazka politikoaren testuinguruan lagungarri gerta dakigulako hango esperientzia.

Kolonbian erdietsitako akordioak nazioartean mugarri berria ezarri duelakoan gaude, gatazka eta bere ondorioen konponbideari dagokionean eta, besteak beste, biktimen kontuari heltzeko orduan.