Sortu

Azaroaren 27tik abenduaren 10era bitartean Kontseilu Nazionalerako izenak proposatu ahal izan zituen Sorturen birfundazio prozesuan akreditatuta zegoen edonork.

Guztira 373 kide izan ziren proposatuak. Horietatik %59 ziren gizonezkoak eta %41 emakumeak. Guztiekin banan banan hitz egin ondoren, 37 izan dira Kontseilu Nazionalerako hautagai izateko proposamena onartu dutenak. Horietatik %19 dira emakumeak eta %81 gizonezkoak.

Araudian zehazten den gisan, hautatzen diren pertsonen artean %60 izan daitezke gehienez gizonezkoak.

Bestetik, hautagaien %62ak 45 urte baino gutxiago ditu.

Gaztetasun horrek aitzitik ez du esan nahi esperientzia eta eskarmentua falta duen jendea denik. Militantzia ibilbide oparoko jendea da. Gazteenetatik hasita, ibilbide oparokoak dira gazte zein ikasle mugimenduetan. Herrigintzan esperientzia aberatsa duen jendea da orokorrean; hasi udalgintzan, juntetan zein parlamentu ezberdinetan eta baita herri mugimenduetan ere.

Aipatzekoa da baita ere eremu profesional ezberdinetan hautagaiek duten jakintza; hezkuntza eremuan, mundu akademikoan, garapen agentzietan, kooperatibagintzan, zientzietan, makina-erremintan, kazetaritzan, arkitekturan zein ikerketa esparru ezberdinetan.

Prozesu guztiz demokratikoa

Kongresu ereduak han eta hemen eztabaidagai diren honetan, balioan jarri nahi du Sortuk Birfundazio Prozesuan garatu duen Kongresu eredua eta metodologia. Urtarrilaren 9tik 20ra zuzendaritzaren erdia baino gehiago hautatuko da Zerrenda Irekien bidez. Beste ezein alderdik ez du erabili halako metodologia ireki eta demokratikorik euren zuzendaritzen hautaketan.

Gogoan izan behar da edonork izan duela edonor proposatzeko aukera eta guztira 373 izen izan zirela proposatuak. Horrek agerian uzten du Sorturen ustez mugimendu bizia eta anitza dela, jende prestatuz eta prestuz osatua.